Nagdangat na sa masobra P6-billion ang balor sang halit nga natuga sang El Niño phenomenon sa sektor sang agrikultura sa pungsod.
Suno kay Department of Agriculture (DA) spokesperson Arnel de Mesa, nagapabilin nga MIMAROPA ang pinakaapektado nga rehiyon kun sa diin naglab-ot sa P1.7 billion ang damage; ginasundan sang Western Visayas nga may P1.5 billion; kag ang Cordillera Administrative Region nga may P800 million.
P3.3 billion sa kapierdehan ang na-rekord sa humay; P1.9 billion sa mais; samtang P1-billion naman sa high-value crops.
As of May 10, may 276 ka mga syudad kag banwa sa pungsod nga napaidalom sa state of calamity. Pinakadamo diri amo ang sa Mindanao lakip na ang probinsya sang South Cotabato kag Sultan Kudarat.
Una na nga ginpahayag sang ahensya nga naga-preparar naman ini subong sa halit nga posible dal-on sang La Niña ukon sobra-sobra nga pag-ulan. Suno sa state weather bureau, may 60 percent chance nga mag-develop ini nga phenomenon halin sa Hunyo tubtub Agusto.
