Kun kahapon gintutukan ang imbukada nga sambuwa sa tunga sang Boston Celtics kag Indiana Pacers sa Eastern Conference Finals, magaliso naman sa subong nga adlaw ang atensyon sa hampang sang Dallas Mavericks kag Minnesota Timberwolves sa Game 1 sa Western Conference finals.
Matabo ini sa homecourt sang Wolves sa Target Center sa Minneapolis 8:30 sa aga oras sa Pilipinas.
Antes nakaabot sa finals, ginlutos sang third-seeded nga Timberwolves ang defending champions nga Denver Nuggets sa Game 7 sa second round.
Sa pihak nga bracket, ginlutos sang No. 5 seed nga Dallas ang Oklahoma City Thunder sa anum ka games.
Magluwas nga maayo ang record sang Wolves sa regular season ipaanggid sa Mavs, may yara pa sila sang home court advantage sa third round sang best-of-seven series.
Isa ang yara sa injury report sang Wolves nga amo si Mike Conley nga wala man nakahampang sa Game 5 sang semis apang nakabalik sa duha ka ulihi nga hampang batok sa Nuggets.
Sa Mavs, ginlista nga probable ang All-Star forward nga si Luka Doncic gani posible nga available man ini sa hampang apisar sang iya nga sprain sa tuo nga tiil.
Sa nagligad nga season,matandaan nga napierde ang Timberwolves sa first round samtang wala naman ang Mavs sa playoffs.
Kun sin-o ang magdaog sa duha amo ang maga-abanse sa finals batok sa winner sa tunga sang Boston Celtics kag Indiana Pacers.
1-0 na ang serye sa pihak pabor sa Boston matapos ang Game 1, 133-128.
