ILOILO CITY – Nagapati ang isa ka political analyst nga mangibabaw sa gihapon ang pagka-sagrado sang sakramento sang kasal.
Ini ang kasunod man sang pagpasar sang House Bill No. 9349 ukon Absolute Divorce Act sa Kamara sa diin gin-aprubahan ini sang mga mamalidha pinaagi sa viva voce.
Sa interview sang Bombo Radyo kay Atty. Joenar Pueblo, Political Law Professor sa University of San Agustin-College of Law, iya ginpahayag nga dapat tutukan sang mga mamalidha ang mga polisa nga makapabakod sang kada pamilya bangud ini ang matuod nga pundasyon sang malinong nga kumunidad.
Suno kay Pueblo, maathag nga paglapas sa pagpati sang simbahan ang ginaduso nga diborsyo.
Magluwas pa diri, indi man maayo ang epekto sini sa mga kabataan nga santo sa pagtuon, masami nga nagaeksperyensya sang emotional distress, academic difficulties kag iban pa.
Ginpahayag sang abogado nga sa baylo nga iduso ang diborsyo, mas maayo nga tutukan ang iban nga pamaagi agud masolbar ang ginapangatubang nga problema sang mag-asawa kaangay sang annulment ukon declaration of nullity.
Nahibaluan nga sa bilog nga kalibutan, ang Vatican City sa Roma kag Pilipinas na lang ang mga pungsod nga wala sang diborsyo.
