ILOILO CITY – Gin-ako sang Chairman sang Committee on Public Utilities sa Iloilo City Council nga dismayado ini sa Metro Pacific Iloilo Water.
Sa interview sang Bombo Radyo kay Iloilo City Councilor Atty. Rommel Duron, iya ginpahayag nga bilang water distribution utility, nagakadapat nga magpangita sang iban nga paagi ang Metro Pacific agud maka-supply sang bastante nga tubig.
Suno kay Duron, yara subong sa state of calamity ang Iloilo City kag bilang naga-isahanon nga water distribution utility, katungdanan sang Metro Pacific nga kaayuhon ang ila pasilidad agud maka-supply sang tubig nga kinahanglan sang mga pumuluyo sa syudad.
Nagakadapat suno sa natungdan nga indi anay maghulat ang nasambit nga water distribution utility sa Jalaur River Multi-Purpose Project Stage II bangud dugay pa ini nga matapos.
Ginbasol man ni Duron ang Metro Iloilo Water District nga kuntani nag-invest sadto sa de-kalidad nga mga tubo kag equipment agud maka-supply sang bastante nga tubig.
Nahibaluan nga mangin si Iloilo City Mayor Jerry Treñas ang nagpahayag man sang diskuntento sa serbisyo sang Metro Pacific sa diin daw kaangay suno sa natungdan nga ginahimo nila nga ‘water boy’ ang local government unit nga amo ang naga-rasyon sang tubig sa mga residente.
