Nagsabat ang China nga wala sang dapat kabalak-an ang Pilipinas sa bag-o nga pagsulundan sang China Coast Guard nga posible magresulta sa pag-detain sa mga foreigners ukon pati ang mga Pinoy nga magasulod sa West Philippine Sea.
Ginpahayag ini ni Chinese foreign ministry spokesperson Mao Ningmatapos nga nagsiling si President Ferdinand Marcos,Jr. nga isa ka akto sang escalation kag makatulublag ang bag-o nga pagsulundan sang Beijing.
Sa anunsyo sang China, epektibo sa Hunyo 15, iga-implementar nila ang 2021 coast guard law kag pahanugutan ang detention sa foreigners nga ginasuspetsahan nga naga-trespass sa ila nga teritoryo.
Suno naman kay Mao, tuyo lang nila nga i-standardize ang pagpatuman sang layi kag palig-unon ang maritime order gani nga wala sang dapat kahadlukan ang bisan sin-o sa kondisyon nga wala lang sang illegal behavior.
Kahapon, Mayo 29, sa atubang sang Philippine Media sa Brunei, ginpahayag ni President Marcos nga wala na sang bag-o sa fishing ban nga ipatuman sang China. Kabahin ini sang ila claim suno kay Marcos nga ang West Philippine Sea ang kabahin pa sang maritime territory sang China.
Antes sini, nag-protesta na ang Department of Foreign Affairs (DFA) batok sa fishing ban sang China bangud nga ginalapas sini ang international law kag wala man ginataha ang sovereignty kag maritime rights sang Pilipinas.
Ginsaad man sang ahensya nga indi pagkilalahon sang Pilipinas ang Mayo 1 tubtub Septyembre 16 nga fishing moratorium sang China bangud gindalasa nila pati ang maritime zones nga ang Pilipinas na kuntani ang may soberanya, may kinamatarong kag hurisdiksyon.
