Nagpahanumdom ang Iloilo Provincial Government sa publiko nga maghalong kag proteksyunan ang kaugalingon kadungan sang paglutaw sang bag-o nga COVID-19 variants nga “FLiRT” sa iban nga mga pungsod.
Ini nga variants ukon kilala man nga KP.2 kag KP.3 ang hugot nga gina-monitor sang World Health Organization kag na-identify man nga descendants sang JN.1, isa ka variant of interest nga amo ang ginatudlo rason sang infection increase sang nagligad nga tuig.
Suno kay Dr. Maria Socorro Quinon, head sang Iloilo Provincial Health Office, dapat nga magpadayon sa pagsuksok sang face mask agud nga malikawan ang paglapta sang virus.
Bisan mild lamang ang mga kaso sang coronavirus suno sa natungdan, indi ini dapat pagbalewalaon ilabi na kun nakitaaan sang sintomas ang mga kabataan.
Magluwas sa maskara, gina-abisuhan man ang publiko nga masami maghugas sang kamot, magpanabon sang baba kun nagapangatsi ukon nagaubo, mag-distansya sa mga senior citizens, kag likawan ang magutok ukon poorly ventilated nga mga lugar.
Sa probinsya sang Iloilo, as of May 20, may yara sang 295 ka bag-o nga COVID-19 cases nga na-rekord halin sang bulan sang Enero.
Manubo man ang Average Daily Attack Rate (ADAR) sang probinsya nga yara lamang sa 0.01% kag minimal man ang healthcare utilization rates.
Sa bahin sang Department of Health Western Visayas, ginpahanumdom man sini liwat sa mga residente ang updated COVID-19 strategy sang national government kun sa diin nalakip ang prevention, detection, pag-quarantine kag isolation, treatment, reintegration, kag vaccination.
Photo: Edd Gumban
