Ginalantaw sang state weather bureau nga Philippine Atmospheric, Geophysical and Astronomical Services Administration (PAGASA) nga 13-18 ka mga bagyo ang magasulod sa Pilipinas subong nga tuig.
Suno kay Deputy Administrator for Research and Development Dr. Marcelino Villafuerte II, mas manubo na ini ipaanggid sa average number sang bagyo nga kinaandan nga 19-20 nga nagasulod sa Philippine Area of Responsibility kada tuig.
Sang nagligad nga tuig,11 ang na-rekord nga mga bagyo nga nakalaslas sa Pilipinas nga posible bangud sa El Niño phenomenon.
Sang Myerkules, Mayo 29, sang opisyal na nga gindeklarar ang pagsugod sang tag-ululan sa Pilipinas.
Subong man nga Mayo sang nagsulod ang labing-una nga bagyo sa Pilipinas subong nga 2024 nga amo si Aghon nga nagbilin sang pito ka mga patay.
Apang gin-athag sang state weather bureau nga indi pa ini La Niña bangud ini nga phenomenon ang posible pa nga mag-umpisa sa ikatatlo nga quarter sang 2024 tubtub sa masunod nga tuig.
