Nagpang-pito lamang sa walo ka pole vaulters ang Filipino pole vault champion kag World No 2. nga si EJ Obiena sa Bauhaus-Galan Wanda Diamond League sa Stockholm, Sweden.
Hinulaman gihapon ang pole nga gingamit sini kag natigayon lamang nga makalukso sang 5.70 meters.
“Not my day today,” pahayag sang Pinoy pride sa iya social media accounts kasunod sang hampang. “5.70m here in the wonderful @bauhausgalan. Thank you to the boys for lending me some sticks to jump on. Greatly appreciate it gentlemen.”
Nagpangibabaw sa kumpetisyon ang World No. 1 kag hometown bet nga si Mondo Duplantis nga naka-rehistro sang 6.00m, samtang nagsunod naman ang mga tiglawas sang Amerika nga sanday Sam Kendricks kag KC Lightfoot.
Si Duplantis ang nagapanag-iya sang world record nga 6.24m kag nagkampyon sa walo ka mga events nga ginpasakupan sini subong nga tuig. Siya man ang ginalantaw nga mangin pinakadaku nga kasumpong ni Obiena sa Paris Summer Games.
Sang Byernes, matandaan nga nagpangaduha si Obiena sa Oslo Bislett Games sa Norway apang nabali ang iya pole pareho sang natabo sa Ostrava Golden Spike sa Czech Republic. Sa Ostrava, pang-pito man ang Filipino pole-vaulter nga nakalukso sang 5.52-m nga amo ang iya lowest clearance sa sulod sang halos duha ka tuig.
Gin-anunsyo naman sang Philippine Athletics Track and Field Association (PATAFA) of the Philippines nga nagbakal na sila sang bag-o nga poles para kay Obiena samtang ginatinguhaan sini nga madaog ang iya mga kumpetisyon antes ang makahalawat-hawat nga hinampang sa Paris.
