Ginpirmahan na ni President Ferdinand Marcos, Jr. bilang isa ka layi ang hagna nga ginduso agud ipasaka sa P10,000 ang tuigan nga teaching allowance sang public school teachers.
Sa idalom sang Republic Act 11997 ukon ang Kabalikat sa Pagtuturo Act, magasugod sa school year 2025-2026 ang increase sa teaching allowance halin sa P5,000 pakadto sa P10,000.
Exempted ini nga teaching allowance sa income tax.
Suno pa sa Presidential Communications Office, ini nga layi amo ang naghatag sa pinakadaku nga increase sa teaching allowance sang mga manunudlo sa pungsod bangud nagsugod ini sa P100 sang 1988 kag P5,000 sang 2021.
Sa idalom sang bag-o nga layi, ini nga allowance ang maga-cover sa balaklon nga tangible kag intangible teaching supplies kag materials, bayad sa incidental expenses kag implementasyon ang nagkalain-lain nga learning delivery modalities.
Ginalauman man nga paagi sa sini, mabuhinan ang galastuhan sang public school teachers kag mabuligan sila nga mahimo sang mayo ang ila trabaho.
Talalupangdon nga wala sa signing ceremony sa Malacañang Palace si Vice President Sara Duterte nga amo ang tiglikom sang Department of Education.
Present naman sanday Senate President Francis Escudero, Speaker Martin Romualdez, kag ang iban nga mga myembro sang Gabinete.
Sa iya naman mensahe kadungan sang seremonya, ginpahayag ni Marcos nga dapat nga suportado gid ang mga overworked kag underpaid educators bilang apresasyon sa ila pagpaninguha para sa development sang mga kabataan.
“Indeed, this new law institutionalizes the provision of an annual teaching allowance and gradually increases it from the current five thousand pesos to ten thousand pesos, which will not be subjected to income tax,” suno kay Marcos sa ceremonial signing sa Malacañang.
“And while it might seem inconsequential to those who are already used to having a steady supply of basic materials for work, this amount makes an enormous difference for our beloved teachers and for the students,” pahayag sini.
Gintawag man sini ang mga manunudlo nga “unsung heroes of societytoiling and burning the midnight oil, as well as teaching the Filipino children not for money or prestige.”#
