ILOILO CITY- Matapos na antes magtakop ang tuig 2024 ang nagapadayon nga pag-upgrade sa tatlo ka mga mayor nga enhancement projects sa Panay nga nagalakip sang Parola Wharf kag Iloilo River Wharf sa Iloilo City, kag San Jose Port sa San Jose de Buenavista, Antique.
Sa interview sang Bombo Radyo kay Allan Rojo, Ports Manager sang Philippine Ports Authority Panay-Guimaras Port Management Office, iya ginpahayag nga sa bahin sang Parola Wharf expansion, yara na ini sa 70.46 percent nga kompleto kag ginalauman nga matapos ini sa Disyembre 11.
Sa bahin naman sang Iloilo River Wharf, yara na ini sa 64.18 percent nga kompleto kag ginalauman nga matapos sa Oktubre 12.
Suno kay Rojo, katuyuan sang sini nga mga proyekto nga mapanami pa ang pagbyahe sa Iloilo City pakadto sa Guimaras and vice versa.
Samtang, ang enhancements naman sa San Jose Port sa Antique ang nagalakip sang perimeter fence improvements, welcome arc, gates, guardhouse, kag asphalt overlay sa pavements kag dalan.
Sa subong, yara na ini sa 34.94 % nga completion rate kag matapos ini sa Disyembre.
Katuyuan sini nga malab-ot ang international standards kag makaganyat sang mas madamo nga stakeholders kag shipping lines sa Antique.
