ILOILO CITY- Nagaapelar ang pamilya sang mag-asawa nga biktima sang hit and run sa Brgy. Pandac, Pavia, Iloilo sa suspek nga magsungka sa otoridad kag atubangon ang ginhimo sini nga krimen.
Sa amo nga insidente, patay gid si Rave Garcia, 33, samtang pilason naman ang asawa sini nga si Shefryl, 23, lunsay residente sang Brgy Onate De Leon, Mandurriao, Iloilo City.
Sa interview sang Bombo Radyo kay Robert Garcia, amay sang napatay nga biktima, iya ginpahayag nga nagalaum sila nga konsensyahon ang driver sang BMW nga sports car.
Suno sa amay, indi sila mag-untat tubtob indi madakpan kag mapasabat sa layi ang suspek nga nagpatay sa iya anak.
Nahibaluan nga halin ang mag-asawa sa Mandurriao pakadto kuntani sa Brgy. Balabag, Pavia sakay sa ila nga mountain bike.
Base sa testigo, may natabo nga pagbinaisay sa tunga sang driver sang pribado nga salakyan kag sa lalaki nga biktima bag-o natabo ang pagbunggo kun sa diin hungod nga ginlasak sang salakyan ang mga biktima.
Ginpahayag nga natumod na sang Pavia Municipal Police Station ang suspek kag ginaalegar nga isa ka negosyante.
