ILOILO CITY- Ginakabig sang Iloilo City District Engineering Office nga panibag-o nga panugod kag isa ka positibo nga butang ang pagsaylo sang lokasyon sang ila sang opisina.
Sa interview sang Bombo Radyo kay Ms. Fema Guadalupe, Public Information Officer sang nasambit nga opisina, iya ginpahayag nga nalipay sila sa ginhatag ni Mayor Jerry Treñas nga lugar para sa ila sa Sooc, Arevalo.
Suno kay Guadalupe, hingagawon nila nga makasaylo subong nga semana santo man sa mando sang alkalde nga dapat makaubos na sila saylo tubtob sa Biyernes.
Paathag sang natungdan, tatlo na ka bulan sang nag- umpisa sila saylo kag napanghimos naman nila ang ila nga mga records nga gin-inventory.
Apang, bangud nga ongoing pa ang construction sa Sooc, Arevalo, temporaryo anay nila nga opisina amo ang daan nga building sang STI sa Mission Road, Jaro kun sadiin arkilahan anay nila ini.
Nahibaluan nga makapila na ka beses nga ginhatagan sang kahigayunan ang Engineering Office nga magsaylo kag nagpromisa man si Engr. Sanny Boy Oropel nga makasaylo sila antes matapos ang ultimatum nga ginhatag sang alkalde.
Samtang, ang Iloilo City Traffic Management Unit naman ang magabulos sa bayaan nga opisina sang Iloilo City District Engineering Office.
