ILOILO CITY- Nag-angkon sang dako nga kahalitan ang sektor sang agrikultura sa La Castellana sa Negros Occidental kasunod sang paglupok sang Bulkan Kanlaon.
Suno kay Mayor Rhumyla Mangilimutan, naguba ang halos tanan nga mga pananom bangud sa paglupok sang bulkan sa nabukid nga mga barangays sang La Castellana.
Natabunan sang abo ang mga tanom kag nagkalaguba bangud man sa nagkalahulog nga mga bato sa lima ka mga barangay.
Pahayag sang alkalde, mainit ang asupre kag mga bato gani nagkalasunog ang mga saging, kamote kag mga talong.
May mga isda man nga nakit-an nga nagkalamatay sa mga kasubaan.
Wala pa matumod kun pila ang balor sang kahalitan sa sektor sang agrikultura.
Una na ginpaidalom sa state of calamity ang La Castellana bangud sa eruption sang Mount Kanlaon.
