Gin-engganyo sang Estados Unidos sang Amerika ang China nga magtambong sa peace summit nga patigayunon sa Switzerland sa Hunyo 15-16 kun sa diin ginalauman nga diskusyunan ang pag-atake sang Russia sa Ukraine.
“We certainly would encourage China to participate in that summit. They’ve attended previous versions of the summit. We thought their presence was helpful. We think their presence would be helpful here,” suno sa State Department sa isa ka briefing.
Una na nga ginsiling sang Ukraine nga masobra na 100 ka mga pungsod ang nagbaton sang imbitasyon sini nga magtambong sa summit para madiskusyunan ang provisions sang peace plan nga gin-outline ni President Volodymyr Zelenskiy para nga tapuson na ang full-scale Russian invasion nga nagsugod pa sang Pebrero 2022.
Sang nagligad lang nga adlaw, nagkadto gid sa Pilipinas ang Ukrainian leader agud imbitaron man si President Ferdinand Marcos, Jr. sa amo nga summit.
Nahibaluan nga ang China ang may suod nga relasyon sa Russia kag una na nagsiling nga indi ini magkadto sa sini nga pagtilipon.
