ILOILO CITY- Natalana nga i-deklarar ni Iloilo City Mayor Jerry Treñas nga ‘persona non grata’ ang Officer-in-Charge sang Iloilo City District Engineering Office nga si Engineer Roy Pacanan.
Ini ang kasunod sang pagkadismaya sang alkalde sa indi pagrespeto sa iya ni Pacanan.
Sa interview sang Bombo Radyo kay Treñas, iya ginpahayag nga indi niya luyag makatrabaho ang kaangay ni Pacanan nga wala sang respeto sa highest elected official sang syudad.
Suno pa sa alcalde, madamo man nga mga proyekto sang district engineering office nga maituturing nga ‘white elephants’ ukon mga mahal nga proyekto apang indi man mapuslan sang publiko.
Una na nga ginpalayas sang alkalde ang Iloilo City District Engineering Office sa ginaokupa sini nga building nga ginapanag-iyahan sang city government.
Ginkuwestiyon man sang opisyal nga apisar ginpondohan sang national government ang pagpatukod sang bag-o nga building para sa DPWH engineering office sa Sooc, Arevalo, apang wala gihapon ini nahuman tubtobo subong.
Nagpaandam man si Treñas nga magapasaka ini sang kaso sa Ombudsman, Civil Service, at Office of the President batok sa opisina kag sa pinuno sini.
