ILOILO CITY- Padayon ang paghatag sang bulig sang Department of Social Welfare and Development (DSWD) Region 6 sa mga pamilya nga tuman nga apektado sang paglupok sang Bulkang Kanlaon sa Negros Island.
Sa interview sang Bombo Radyo Iloilo kay Atty. Carmelo Nochete, regional director sang Department of Social Welfare and Development Region 6, iya ginpahayag nga nakahatag na sila sang kabilugan nga P1.8 million nga balor sang food kag non-food items.
Suno sa iya, ang nasambit nga bulig ang nahatag sa 1,650 nga mga pamilya ukon 5,514 nga mga indibidwal.
Kadamuan sa mga apektado nga pamilya ang halin sa La Castellana, Negros Occidental nga nagalab-ot sa 1,239 ukon 4,293 nga mga indibidwal.
Ang iban pa nga mga recipients ang halin sa La Carlota City, Bago City, kag Pontevedra.
Sa subong, nagapabilin sa gihapon sa mga evacuation centers sa La Castellana ang 1,177 families, ukon 4,131 nga mga indibidwal.
Samtang, yara sa 50 naman nga mga displaced families ukon 129 nga mga indibidwal ang nagapabilin sa ila nga mga himata.
Magluwas diri, naghatag man ang local government units (LGUs) sa Negros Occidental sang P1 million nga balor sang assistance.
