Nagpangabay ang Philippine National Police (PNP) sa mga supporters ni Pastor Apollo Quiboloy nga magkalma lang kag tugutan ang mga pulis nga maghimo sang ila trabaho bilang law enforcers.
Ginpahayag ini ni PNP spokesperson Col. Jean Fajardo matapos nga nagtumpok ang supporters sang pastor kahapon, Hunyo 10, kag nagbutang sang barikada sa atubang sang Kingdom of Jesus Christ headquarters sa Davao City agud nga indi makasulod ang mga pulis kag maserbe ang warrant kay Quiboloy nga wanted bangud sa child abuse, sexual abuse kag qualified trafficking cases nga na-file sa korte sa Davao kag Pasig.
“So ang pakiusap natin ay maging mahinahon tayong lahat. Ang inyong kapulisan ay nandoon for the official discharge of their duties. Walang anumang hangarin ang ating kapulisan na magkaroon ng anumang sakitan at anumang pagkakagulo,” suno kay Fajardo sa briefing sa Camp Crame, Quezon City.
Sa amo man nga statement, nagpanawagan ini kay Quiboloy nga magsungka kag atubangon ang iya mga kaso agud malikawan ang kaangay nga natabo kahapon.
Wala man sang indikasyon suno sa iya nga nakaguwa si Quiboloy sa Pilipinas kun basehan ang record sang Bureau of Immigration.
“There is no indication so far that Pastor Quiboloy has already left the country because there is no confirmation yet from the Bureau of Immigration. The mere fact that they are simultaneously implementing warrants of arrest is an indication that we believe that he is still here in the country,” suno sa police official.
Nahibaluan nga ginabanta 100 ka mga pulis sa pagpanguna sang armado nga mga operatiba sang Special Action Force kag Criminal Investigation and Detection Group ang nagsulod sa mga propiedad ni Quiboloy kahapon apang napaslawan man sila nga maaresto ang self-proclaimed Appointed Son of God kag ang iya kaupdanan.
Ang mga compound nga ginsulod ang nahamtang sa Davao City, Samal Island, kag Sarangani.#
Photo: Karl Bryan Porras
