LAMBUNAO, ILOILO – Arestado ang mag-abyan nga durugista sa drug buy bust operation sa Barangay Magbato, Lambunao, Iloilo.
Ang mga ini amo sanday alyas John John, 19, kag alyas Junjun, 24, lunsay residente sang Barangay Damo-ong, Janiuay, Iloilo.
Sa interview sang Bombo Radyo kay Police Major Roy Tayona, hepe sang Lambunao Municipal Police Station, iya ginpahayag nga duha ka semana nila nga ginbantayan ang duha ka mga durugista.
Ini matapos nakabaton sila sang impormasyon nga nagabaligya ang mga ini sang iligal nga droga sa boundary sang Janiuay kag Lambunao, Iloilo.
Ginapatihan nga ginakuha sang mga ini ang iligal nga droga sa Janiuay.
Suno kay Tayona, nabaklan nila ang duha sang 10 grams sang suspected shabu nga nagabili sang P68,000.
Sa subong, preso na ang mga ini sa Lambunao Municipal Police Station kag nagapangatubang sang kaso nga paglapas sa Republic Act No. 9165 ukon Comprehensive Dangerous Drugs Act of 2002.
