ILOILO CITY- Ginhatagan importansya ni Iloilo City Vice Mayor Jeffrey Ganzon ang selebrasyon sang 126th Independence Day nga ginpatigayon sa Plaza Libertad.
Sa interview sang Bombo Radyo kay Ganzon, iya ginpahayag nga dako nga balor ang dapat ihatag sa sini nga adlaw.
Suno sa iya, mapakita ini paagi man sa paghatag pasidungog sa syudad.
Dugang niya, nagakadapat man nga balikdon ang tanan nga mga hinimuan sang mga katigulangan nga amo ang nagbaka-baka kag nagpakig-away para sa kahilwayan.
Sa mensahe naman ni Deputy Regional Director for Administration nga si Police Brigadier General Archival Macala nga guest speaker sa kahiwatan, iya ginpahayag nga sa ila nga bahin sa Philippine National Police, ginakabuhi nila ang ginatawag nga pagpakigbato para sa kahilwayan paagi sa preserbasyon sang kalinong kag katawhay agud mahilway ang mga tawo sa mga butang nga makahalit sa ila kaangay sang krimen.
Ginpasiguro man sini nga padayon ang ila pagpakigbato para sa proteksyon sang mga pumuluyo.
