ILOILO CITY- Ginpabakod pa sang Court of Appeals ang pagbasura sa kaso- administratibo nga ginpasaka ni anay City Health Office (CHO) chief Bernard Caspe batok kanday Mayor Jerry Treñas kag anay empleyado sang opisina nga si Khrystyl Marie Lampa.
Ini matapos gin-dismiss sang 18th Division sang amo nga korte ang petisyon ni Caspe nga baliskadon ang desisyon sang Office of the Ombudsman-Visayas angot sa pag- dismiss sa misconduct complaints nga iya gin-file batok kay Treñas kag kay Lampa.
Suno sa appeals court, “misplaced” ang argumento ni Caspe.
Matandaan nga sang 2020, gin-akusahan ni Caspe ang duha sa gin-alegar niya nga paglapas sa Republic Act No. 6713, 2017 Rules on Administrative Cases in the Civil Service, conduct prejudicial to the best interest of the service kag Grave Misconduct.
Kasunod ini sa ginpasaka ni Lampa nga complaint batok kay Caspe bangud sa ginaalegar nga grave abuse of authority kag imoralidad.
Gin-alegar ni Lampa nga samtang isa pa lang siya ka Nursing Assistant sa Arevalo District Health Center sang 2011, naga-flirt sa iya ang doctor apisar nga may asawa na ini.
Sa bahin ni Caspe, ginpanindugan sini nga gindalukan siya sang husto nga proseso bangud wala ma lang ini ginpaidalom sa preliminary investigation.
Gindugang pa ni Caspe nga ginpahog ini kag ginapabudlayan sang alkalde.
Ginbasura sang korte ang alegasyon ni Caspe batok kay Treñas.
Subong man, ginpahayag sang Ombudsman nga wala sang bastante nga ebidensya batok sa duha ka ginareklamo kag ginbasura man ang alegasyon nga gindalukan ini sang due process.
