ILOILO CITY- Natalana nga ipatawag liwat sang Iloilo City Council ang Metro Pacific Iloilo Water matapos nag-ako ini nga madamo pa sila sang kinahanglan nga kaayuhon sa ila operasyon.
Sa interview sang Bombo Radyo kay Angelo David Berba, Chief Operating Officer sang Metro Pacific Iloilo Water kag Metro Iloilo Water District, iya ginpahayag nga isa sa ila ginatutukan amo ang pagkay-o sang mga pipes agud mapahagan- hagan ang nagakauyang nga tubig ukon non-revenue water.
Suno kay Berba, ginatinguhaan gid nila nga ma-expedite ini nga mga pipe replacements.
Gin-athag naman niya nga indi man nila ini madali-dali bangud nga mabudlay ang proseso sang pag-diagnose sang mga pipes kun kinahanglan nga bayluhan.
Matandaan nga sang Hunyo 10, nag-convene ang city council bilang Committee of the Whole bilang sabat naman sa sulat ni anay councilor R Leone Gerochi kay Public Utilities Committee chairperson Councilor Romel Duron.
Nahanungod ini sa rate increase nga ginaproponder sang amo nga water distribution utility.
Ginplastar ni Berba sa hearing nga ang rate adjustment ang may katuyuan nga i -augment ang pondo sang Metro Pacific Iloilo Water nga nagapatuman na sang mga key projects sini sang nagliligad nga tinuig nga wala sang pagpasaka sa taripa.
Nahibaluan nga P9.19 per cubic meter per month increase nga ginapetisyon sa Local Water Utilities Administration (LWUA) ang pinakauna humalin sang 2019.
