Gin-athag sang Department of Foreign Affairs (DFA) nga padayon pa nila nga ginakumpirma ang impormasyon nga may Filipino seafarer nga napatay matapos gin-atake sang Houthi rebels sang Yemen ang MV Tutor sa Red Sea.
Ang MV Tutor ang isa ka Liberian-flagged, Greek-owned nga barko.
Suno kay Foreign Affairs Undersecretary Eduardo de Vega, indi pa nila makumpirma ang kamatayon, tubtob indi nila personal nga makita ang lawas sang Filipino seafarer.
Nagalaom man ini nga buhi pa sa gihapon ang nasambit nga seafarer, nga sa subong nagapabilin nga missing.
“No absolute confirmed [information] yet as far as [Philippine] government is concerned,” pahayag ni De Vega.
Ginpahayag ni De Vega nga nakigkita na ang Philippine Embassy sa Athens sa idalom ni Ambassador Giovanni Palec sa shipping principal sang MV Tutor.
Diri kag ginpahibalo sang principal sang MV Tutor si Ambassador Palec nga patigayunon ang search operations sa na-missing nga Filipino seafarer sa tion nga madala na ang barko sa hilway nga pantalan.
“We remain hopeful and are in touch with the family of the seafarer,” dugang pa ni De Vega.
Una diri, gin-report sang Agence France-Presse, sa diin gin-quote nila si National Security Council spokesman John Kirby nga napatay na ang Filipino seafarer.
Santo sa report, ginsulod sang tubig dagat ang MV Tutor kag gin-abandona matapos gin-atake sang sea drone.
Nag-abot naman kahapon sa Pilipinas ang 21 sa 22 ka mga Filipino crewmen nga sakay sang nasambit nga barko.
