ILOILO CITY- Nagdepensa ang pinuno sang Iloilo City Traffic Management may kaangtanan sa alegasyon sang barangay kagawad nga naninggit ini sa telepono.
May kaangtanan ini sa reklamo ni Kagawad Romar Martirez sang San Pedro, Molo nga gintaasan ini sang tingog ni retired Police Colonel Uldarico Garbanzos.
Nag-ugat ang isyu sang nagpatigayon sang clearing operation ang Iloilo City Traffic Management Unit (ICTMU) kun sa diin nagpadulong sa area si Martirez nga nakasakay sa motorsiklo apang wala sang helmet rason nga ginsaway ini sang isa ka pulis kag gin-alegar niya nga ginhambalan pa siya sang masakit nga tinaga kun sa diin nahuy-an siya bilang barangay opisyal sa atubang sang pumuluyo.
Gin-report ni Martirez ang insidente kay Police Lieutenant Colonel Lorenez Losaria, Deputy City Director for Operations sang Iloilo City Police Office (ICPO) kaangot sa akto nga gin-ubra sang pulis.
Nagtawag si Garbanzos kay Martirez bangud ginapahayag nga wala sini nagustuhan ang pagpanugid sang kagawad kay Col. Losaria kaangot sa pagsita sa iya.
Sa interview sang Bombo Radyo kay Garbanzos, iya ginpahayag nga wala niya gintaasan sang tingog si Martirez sang gintawgan niya ini sa telepono kag normal lamang niya ini nga tingog sa tion nga may yara ini sang gina-verify ngaa impormasyon tuhoy sa ila operasyon.
Suno kay Garbanzos, may yara lang sang misunderstanding sa tunga nila nga duha ni Martirez kag nakapangayo naman ini sang dispensa sa kagawad.
May kaangtanan naman sa alegasyon ni Martirez nga nagpangayo ang mga tinawo ni Garbanzos sang P300 nga pamahaw halin sa mga pumuluyo sang Brgy. San Pedro, Molo, ginsiling niya nga mas maayo nga magpasa si Martirez sang written affidavit agud maimbestigaran ang amo nga reklamo.
Suno kay Garbanzos, possible makakas sa trabaho ang nasambit nga mga personnel pananglitan nga mapamatud-an ang alegasyon sang barangay official.
