ILOILO CITY- Ginakabig ni Iloilo 3rd District Board Member Matt Palabrica, myembro sang Committee on Agriculture sa Sangguniang Panlalawigan, nga isa ka welcome development ang plano sang gobyerno nga pabaligyaon ang National Food Authority sang P29.00 per kilo sang bugas halin sa ila daan nga stocks.
Sa interview sang Bombo Radyo kay Palabrica, iya ginpahayag nga pamaagi ini sang administrasyon nga bisan paano, matuman ang promisa sini nga P20 kada kilo sang bugas.
Apang suno kay Palabrica, kun lantawon, bentaha ini sa mga konsumidor apang indi ini paborable sa mga mangunguma magluwas lang kun i-subsidize sang gobyerno ang mga rice farmers paagi sa pagbakal sang ila unmilled rice sa naandan nga presyo nga P25 to P30 kada kilo.
Suno sa board member, isa man sa posible disbentaha sini ang kwestyonable nga kalidad sang daan nga bugas sang National Food Authority nga base sa nauna nga mga feedbacks, ginabubod nalang sa mga manok bangud indi manami kaunon sang tawo.
Dugang pa sang opisyal, posible man nga mangin source of corruption ini sang mga opisyal sang gobyerno kag kahimbon ang mga rice traders nga posible hingalitan ang sitwasyon kag simpunan sang imported rice ang ini nga local rice agud nga mas mangin barato kag kompetensyahan sa gihapon ang P29 nga presyo.
