Nagtambong sa hearing sang Senado ang isa babaye halin sa Concepcion, Tarlac agud magtestigo nga ginpeke lang ang iya pirma kag ginkawat sang Philippine Offshore Gaming Operator (POGO) hub sa Bamban ang iya nga identity.
Ini amo si Merly Joy Manalo Castro nga nagmato-mato mismo sa pagpakig-angot sa opisina ni Senator Risa Hontiveros matapos nahibaluan nga nadala siya sa ginkasuhan sang Department of Justice (DOJ) sang nagligad nga Byernes kaupod kay Bamban Mayor Alice Guo bangud sa ginaalegar nga kahilabtanan sa gin-raid anay nga Hongsheng Gaming Technology Inc.
Sa record sang Securities and Exchange Commission (SEC), nalista siya bilang incorporator sang Hongsheng apang ginpahayag ni Castro sa atubang sang Senado nga wala siya sang hinalung-ong kaangot sa korporasyon kag wala man sang ihibalo kun ano ang trabaho sa POGO.
Nakibot man ini nga ginpadal-an siya sang sulat halin sa Bureau of Internal Revenue (BIR) kaangot sa pagsirado sang Hongsheng rason nga ginkadtuan man sini ang ahensya kag ginklaro nga wala siya sang labot sa amo nga kumpaniya.
Suno pa kay Castro, wala siya sang ideya kun nga ginpadal-an siya sang imbitasyon nga magtambong sa hearing sang Senate committee on women, children, family relations, and gender equality nga amo ang naga-imbestigar sa gin-raid nga POGO hub sa Bamban.
“Nalaman ko lang po ‘yung mga pangalan nu’ng lumabas nu’ng Friday night na kasama po ako sa list ng mga pinapasa nasa DOJ na, which is sobrang takot ko po kasi wala po akong idea paano po ako nandodoon,” pahayag sini.
“Inantay ko po talaga, pinanood ko hanggang gabi nung nilabas po sa balita ‘yung mga kasali, nabasa ko po ang pangalan ko. Nalaman ko lang nga po kasi nu’ng unang letter niyo, tapos may sumunod po kasing letter from BIR, closure daw po nung Hongsheng and pumunta po ako sa BIR to inform them na wala akong ipapasang papel kasi hindi po ako connected,” dugang sini.
Sa iya statement, ginsiling man sini nga wala siya sang ginapirmahan nga dokumento nga naangot sa Hongsheng ukon sa anuman nga dokumento nga maga-establisar sang isa ka kumpaniya.
Sunod nga ginkumparar ni Hontiveros ang Tax Identification Number (TIN) ID nga ginhatag ni Castro sa card nga ginpasa naman sang Hongsheng.
Nagguwa nga indi pareho ang TIN sa duha ka IDs pero pareho ang pirma. Ginsiling naman ni Castro nga ginpeke ang iya pirma.
Ginbuyagyag man sini nga nakilala niya ang tatlo ka pangalan nga nalista man nga co-incorporators sa Hongsheng apang indi siya sigurado kun matuod nga incorporators sila ukon pareho man sa iya nga wala sang hinalung-ong sa natabo.
Ini tanan ang iya nakilala sa merkado sa Concepcion, Tarlac kun sa diin isa ang nagabaligya sang utan, isa ang nagabaligya sang pamahaw, kag isa naman ang nagabaligya sang inasal nga manok.
Handa man si Castro nga depensahan ang iya kaugalingon sa DOJ bangud wala siya sang ihibalo kun paano nagkadto ang iya pirma kag identity sa POGO.
Matandaan nga ang ginpasaka nga reklamo sang nagligad nga Byernes amo ang paglapas sa Sections 4 kag 6 sang Republic Act (RA) 9208 ukon ang Anti-Trafficking in Persons Act of 2003. Ang nagapangatubang sini nga reklamo amo si Mayor Guo, former Technology and Livelihood Resource Center (TLRC) deputy director general Dennis Cunanan, kag 12 ka iban pa nga gina-alegar officers kag incorporators.
