Nag-abot na sanday United States President Joe Biden kag anay Presidente Donald Trump sa Atlanta, Georgia inoras antes ang ila presidential debate nga naangot na sa ila rematch para sa 2024 elections.
Ginsugata sang local Democrats ang 81-anyos nga presidente sang naghugpa ang Air Force 1 sa Dobbins Air Reserve Base sa Marietta, samtang sakay naman ang 78-anyos nga ex-president sa private jet ukon ang iya ginatawag nga “Trump Force 1.”
Naka-schedule ang debate las 9:00 sa gab-i sa Atlanta, Georgia ( las 9:00 sa aga oras diri sa Pilipinas subong nga Byernes.)
Ini nga reunion sang duha ang ginabantayan gid sang bug-os nga Amerika bangud wala pa sang record sa maragtas nga may isa ka current president nga nag-debate batok sa iya ginsundan nga presidente.
Ini man ang una nga bes nga magatapak ang duha sa debate stage pagkatapos sang ila debate apat ka tuig na ang nagligad. Sa ikaduha nga hugnat sang amo nga debate sang 2020, mataas ang tension rason nga wala na gani sila nagkamustahanay.
Wala man nag-concede si Trump kay Biden sa 2020 election, kag inadlaw matapos gin-atake sang iya supporters ang US capitol, wala man sini ginsunod ang tradisyon kag wala ini nagtambong sa inagurasyon sang Democrat.
Indi kaangay sa nagligad nga mga debate, patigayunon ini subong nga adlaw sa cable television studio nga wala sang live audience kasunod sang request sang kampo ni Biden. Magalawig sang 90 minutos, may duha lamang ka commercial breaks, kag iga-mute ang ila nga mikropono magluwas lang kun ila na turno sa paghambal.
Pagkatapos subong nga adlaw, maga-atubangay sila liwat sa Septyembre para sa ikaduha nga hugnat sang debate.
