Nagsabat na si Vice President Sara Duterte matapos nagguwa ang mga espekulasyon nga siya ang mangin lider sang opposition kasunod sang iya pag-resign sa gabinete ni President Ferdinand Marcos, Jr.
Suno sa bise-presidente, sa iya trabaho, pagkatawo, kag prinsipyo, wala siya nagahulag para sa administrasyon kag wala man para sa opposition ukon para sa anuman nga politikal nga rason.
Ginsiling sini nga ang iya hulag ang ginabase niya sa kun ano ang makabulig sa publiko kag kun ano ang nagakadapat.
“Sa trabaho ko at sa pagkatao ko at sa prinsipyo ko, hindi ako gumagalaw for the administration, for the opposition, or kung anuman ‘yang political na ‘yan. Ang galaw ko ay base sa kung ano ‘yung makakatulong sa ating mga kababayan, at kung ano ‘yung karapat-dapat,” pahayag sini.
Ginpahayag man ni Duterte nga ginatutukan niya subong ang 30-day transition plan para sa tanan nga strands sang Department of Education Central Office kag mga aktibidad kag proyekto sa idalom sang Office of the Vice President.
Matandaan nga sang nagpanaog si Duterte bilang tiglikom sang DepEd kag vice chairperson sang National Task Force to End Local Communist Armed Conflict (NTF-ELCAC), gin-anunsyo ni anay presidential spokesperson Harry Roque nga siya na ang lider sang opposition.
May mga nagasiling man nga ang iya pag-resign amo na ang pormal nga break-up nila ni Marcos ukon sang Uniteam kag amo man ini ang deklarasyon sang open war sa tunga sang mga Duterte kag Marcos.
