Nakahibalo si anay Presidente Rodrigo Duterte kun sa diin nagapanago ang iya abyan nga si Kingdom of Jesus Christ (KOJC) leader Apollo Quiboloy apang indi ini magpanugid sang lokasyon.
Suno sa anay presidente nga amo man ang administrator sang mga propiedad sang KOJC, “secret” lang niya ini.
Wanted si Quiboloy kag may standing arrest warrants para sa sexual kag child abuse kag human trafficking cases, apang wala ini nagasungka sa otoridad.
Matandaan nga ginkondena anay ni Duterte ang pamaagi kag pwersa sang pulis nga gingamit sang ginserbe ang warrants of arrest batok kay Quiboloy kag lima pa sini ka mga kaupdanan sa Davao City sang Hunyo. Gintawag man sini nga “overkill” ang natabo bangud ginabanta 100 ka mga pulis sa pagpanguna sang armado nga mga operatiba sang Special Action Force kag Criminal Investigation and Detection Group ang nagsulod sa propiedad ni Quiboloy apang napaslawan man sila nga maaresto ang self-proclaimed Appointed Son of God kag ang iya kaupdanan.
Ang mga compound nga ginsulod sang otoridad sang nagligad nga bulan ang nahamtang sa Davao City, Samal Island, kag Sarangani.
Padayon naman ang apelar sang Philippine National Police kay Quiboloy nga magsungka na lang kag atubangon ang mga kaso nga gin-file batok sa iya.
