Nagpanginwala si anay Presidente Rodrigo Duterte nga mapadalagan siya sa pagka-senador sa 2025 elections.
Baliskad ini sa gin-anunsyo sang iya anak nga si Vice President Sara nga may plano nga magpadalagan sa pagka-senador ang iya amay kag duha ka mga utod nga sanday Davao City Mayor Sebastian “Baste” Duterte kag Davao City First District Representative Paolo Duterte.
Suno naman sa 79-anyos nga former president, indi dapat pagpatihan ang ginhambal sang iya anak nga bise-presidente.
Ginpahayag man sini nga indi na siya magbalik sa pulitika bangud tigulang na siya kag wala siya sang budget.
“You believed Inday? She made a fool out of you. Where can you see a father and his two sons in the Senate?” suno sa former president sang nagbisita ini sa Tacloban, Hunyo 30. “I will not return to politics. I’m done. I’m old. I don’t have money to spend. Yabang lang meron ako.”
Matandaan nga sang nagligad nga adlaw, ginplastar man ni Sara nga wala siya nakahibalo kun may iban nga updon sa line-up sang iya amay, apang sa iya pagbanta, bangud halin ang iya amay sa Partido Federal ng Pilipinas (PFP), posible nga may iban man halin sa amo nga partido nga makaupod sa ila nga senatorial slate.
