ZAMBALES – Nakaabot na sa Subic Bay Metropolitan Authority (SBMA) Port sa Zambales ang mga Pinoy nga manugpangisda nga na-rescue matapos naglupok ang makina sang ila nga sakayang pandagat nga may kalayuon nga 17 nautical miles southwest sang Bajo de Masinloc nga kilala man bilang Scarborough Shoal ukon Panatag Shoal.
Sa statement nga ginpagwa sang Philippine Coast Guard (PCG), sakay sang BRP Sindangan ang nasambit nga mga manugpangisda sang nagdungka sa Subic.
Gilayon naman nga gindala ang duha ka pilason nga mga manugpangisda sang Filipino fishing boat ukon FFB Akio sa SBMA Public Health and Safety Department kag ginsaylo sa ospital agud madapatan sang nagakaigo nga pagbulong.
“The Coast Guard crew turned over the two injured fishermen of FFB Akio to the SBMA Public Health and Safety Department (PHSD) for transport to the nearest hospital for further medical assistance,” pahayag sang PCG.
Matandaan nga sang Sabado, duha sa walo ka mga manugpangisda ang napilasan matapos naglupok ang makina sang FFB Akio.
Agud mahatagan sang medical assistance, gin-deploy sang PCG ang BRP Sindangan sa area kag naghatag sang first aids ang mga nurses sa mga manugpangisda nga nag-angkon sang second degree burns bangud sa pagsigabong.
Suno naman kay PCG spokesperson Rear Admiral Armando Balilo, gintuyo pa sang China Coast Guard (CCG) kag People’s Liberation Army (PLA) Navy ships nga balabagan ang BRP Sindangan samtang nagapatigayon sang towing operation sa sakayang pandagat.
“The CCG and PLA Navy vessels stopped shadowing our ship when they were informed by the Angel of the Sea on board about the humanitarian mission,” pahayag ni Balilo.
“The CCG also launched two rigid hull inflatable boats (RHIBs) and offered to help the eight fishermen of FFB Akio,” dugang pa ni Balilo.
Ginpasigurado man sini ang safety sang kabuhi sang mga manugpangisda ilabi na sa tion sang emerhensya.
Apang suno kay Balilo, sa ulihi, nag-istorya man ang PCG kag CCG sa isa ka diplomatiko nga paagi kag ginpa-iway anay ang isyu sa soberanya.
“The swift rescue operation proves the significance of our constant presence at BDM”.
“We will not elevate tension, but we will remain firm on our mission to ensure the safety of lives at sea. Rest assured that Coast Guardians will continue to protect, look after, and take good care of the welfare of our fishermen no matter what, the Coast Guard way,” dugang pa sini.
Nahibaluan nga ang Bajo de Masinloc ukon Scarborough Shoal ang sakop sang Philippine exclusive economic zone.
Sang 2016, ang international arbitration tribunal sa the Hague ang nagdesisyon nga ang claim sang China sa West Philippine Sea ang wala sang legal nga basehan, apang wala ini ginakilala sang Beijing.
