Ginkumpirma sang Philippine Coast Guard (PCG) nga ginbungguan sang China Coast Guard (CCG) ang Philippine BFAR vessel nga BRP Datu Magat Salamat ukon MMOV 3015 subong nga adlaw, Septyembre 18.
Ini man nga Philippine vessel ang ginbuligan sang PCG kahapon samtang nagapatigayon sang maritime patrol kag nagahatag sang fuel subsidy sa mga Pilipino nga manugpangisda.
Suno sa post ni PCG Spokesperson for the West Philippine Sea Rear Admiral Jay Tarriela, 11:04 kaina sang aga, nagtabok ang CCG vessel CCG-21585 sa likod nga bahin sang BFAR vessel sa distansya nga mga 10 metros lamang.
Paglabay sang pila ka minutos, samtang nagapadayon lamang sa iya ginakadtuan nga direksyon ang MMOV 3015, ginsulit sang Chinese vessel ang amo man nga maneuver kag sa sini nga tion, natabo na ang pagbungguanay.
Nakumpirma nga may mga damage sa tuo nga bahin sang BFAR vessel, lakip ang mga main railing nga nabali pati ang mga metal stanchion kag support structures nga na-deform.
Na-displace man ang iban nga deck fixtures kag equipment kag naglapta ang mga debris sa deck sang barko.
Pagkatapos sang pagbungguanay, naghimo pa gid sang isa ka delikado nga maneuver ang CCG-21585 kag naglabay sa likod mismo sang BFAR vessel sa distansya nga mga lima ka metros lamang.
Nagluntad ang insidente sa coordinates nga 09°34.445’N, 116°53.714’E, ukon mga 6.36 nautical miles sa north-northwest sang Abad Santos Shoal kag mga 54 nautical miles halin sa baybayon sang Palawan nga yara sa sulod sang exclusive economic zone sang Pilipinas.
Ginmanduan na ni Philippine Coast Guard Commandant Admiral Ronnie Gil Gavan ang mga surface kag air assets sang PCG nga magkadto sa lokasyon sang BFAR vessel agud maghatag sang bulig kag masiguro ang kaluwasan sang mga tripulante.
