Ginpatawag ni President Ferdinand Marcos Jr. si Chinese Ambassador Jing Quan sa Malacañang agud istoryahan ang nagluntad nga komprontasyon sa tunga sang China Coast Guard kag sang mga personnel sang Philippine Navy nga naka-estasyon sa Ayungin Shoal nga sakop sang West Philippine Sea.
Suno sa Chinese envoy, nangin mapuslanon ang ila pagkit-anay kag nagtutok sa pagpangita sang solusyon sa baylo nga magbinasulay.
Samtang, suno sa mga sources sa Palasyo, naplano na nga daan ang nasambit nga meeting antes pa natabo ang insidente sa West Philippine Sea. Ini bangud, kun matandaan, sang nagligad nga semana, nagpaguwa ang state media sa China sang AI-animated video nga ginkaakig sang Philippine officials bangud sa pagpatuhoy nila sa mga Pinoy bilang mga amo.
Sa pihak nga bahin, ginpahayag naman sang Chinese Foreign Ministry nga ginpatawag man sini si Philippine Ambassador Jaime FlorCruz sa Beijing agud nga istoryahan ang ila ginlaragway nga “provocation and attack” sang Pilipinas sa Ayungin.
Sa bahin ni Presidential Communications Undersecretary Claire Castro, ginpahayag sini nga nagapabilin ang bug-os nga suporta ni Presidente Marcos sa mga Pilipino nga mga soldado nga nagabantay sang katungdanan kag soberanya sang pungsod sa West Philippine Sea.
Ginkondenar man sang Presidente ang nagluntad nga insidente nga nagresulta sa pagkasamad sang ulo sang personnel sang Philippine Navy matapos nga ginhampak ini sang baton sa ulo.
Nauna na nga ginpaathag sang Armed Forces of the Philippines ukon AFP nga ginhampak sang baton ang Pilipino nga personnel matapos magpalapit ang isa ka rigid-hull inflatable boat sang China Coast Guard nga may sakay nga walo ka mga personnel sa BRP Sierra Madre.
Ginpahayag sang militar nga naglibot ang Chinese vessel sa BRP Sierra Madre kag nagkuha sang mga litrato kag video samtang nagapadayon ang ila presensya malapit sa Philippine military outpost.
Natabo ang insidente pila lamang ka oras matapos ipahibalo sang Department of Foreign Affairs nga magakit-anay ang mga chief diplomat sang Pilipinas kag China sa isa ka regional summit nga pagahiwaton sa Manila sini nga semana.
