Magasulod sa San Antonio Spurs ang veteran point guard kag 12-time NBA All-Star nga si Chris Paul matapos ini nga gin-waive sang Golden States Warriors.
Ginalantaw nga siya ang mangin starting point guard sang team kag makabulig bilang playmaker sa San Antonio star kag 7ft 4in center nga si Victor Wembanyama kag magadugang man sa pwersa sang four-year veteran nga si Tre Jones nga amo ang point guard.
Isa ka season ang gintinir ni Paul sa San Francisco kun sa diin nangin backcourt mate kag backup siya sa superstar nga si Stephen Curry.
Sa 58 games lakip na ang 18 sang nagligad nga season, may average siya nga 9.2 points, 6.8 assists, 3.9 rebounds, 1.3 turnovers kag 1.2 steals per game.
39-anyos na ang edad ni CP3 kag malayo na ang scoring abilities sa iya All-Star prime apang ginalantaw nga maayo gihapon nga playmaker kag floor general.
Sandig sa inisyal nga reports, nagsugtanay si Paul kag ang Spurs sa kontrata nga isa ka tuig kag $11 million-plus.
Sa pihak nga bahin, isa naman ka free agent ang Golden State star guard nga si Klay Thompson. Ang nasambit nga 13-year NBA veteran ang ginabati-bati nga gina-istorya sang Dallas, Philadelphia, Clippers kag Los Angeles Lakers.
