ILOILO CITY – Indi na kinahanglan pa nga i-remind ang Department of Public Works and Highways (DPWH) sa pag-report sang updates sang mga proyekto nga i-implementar sa syudad sang Iloilo.
Ini kasunod sang hingyo ni City Administrator Mr. Melchor Tan kay DPWH Region 6 Director Engr. Sanny Boy Oropel nahanungod sa status ukon updates sang mga proyekto nga wala pa natapos ukon wala pa naumpisahan.
Sa sulat sang City Administrator nasaad ang pito ka mga proyekto kaangay sang Mandurriao Market; Multi-Purpose Project sang Barangay Concepcion, City Proper; Sports Complex sa Jalandoni Memorial National High School; Multi-Purpose Building sang Barangay Tanza Esperanza, City Proper; Multi-Purpose Building sang Barangay Santa Filomena, Arevalo; Multi-Purpose Building sang Barangay Balantang, Jaro kag Multi-Purpose Building sang Barangay Katilingban, Molo.
Sa interview sang Bombo Radyo kay Director Oropel, iya ginpahayag nga may yara sang Department Order ang ahensya nga ginasunod sa diin tanan kag indi pili lang nga proyekto ang gina-report sa Local Chief Executive sang isa ka lugar.
Suno kay Oropel, kada una nga semana sang bulan ang paghatag sang DPWH sang report ukon status sang mga proyekto.
Posible nga wala lang nahatagan sang kopya ang City Administrator pahayag niya bangud kada bulan, nagahatag ang ahensya sang update sa Local Chief Executive.
Wala na naghatag pa sang statement si Director Oropel nahanungod sa deklarasyon ni Mayor Jerry Treñas kay Iloilo City District Engineer Roy Pacanan nga persona non-grata.
Dugang sang natungdan, wala sa iya nga lebel ang pag-relieve kay Engr. Pacanan sa pwesto sa diin si DPWH Secretary Manuel Bono-an lang ang makahimo sang amo nga tikang.
Sa subong, gina-evaluate naman sang ahensya ang natabo sa Iloilo City District Engineering Office.
