CALINOG, ILOILO – Gin-athag sang mga otoridad nga wala sang may natabo nga abduction sa Delgado Street, Calinog, Iloilo City.
Sa interview sang Bombo Radyo kay Police Major Myles Dieron, hepe sang Calinog Municipal Police Station, iya ginpahayag nga santo sa ila imbestigasyon, away mag-asawa lang ang natabo sang Hunyo 30.
Sa nasambit nga insidente, una nga ginpahayag sang mga witness nga may nabatian sila nga may tingog sang babaye nga nagasinggit kag nagapangayo sang tabang samtang ginasakay sa maroon nga pick-up truck.
Sang naglakat na ang pick-up truck, ginsundan ini sang lima ka mga lalaki nga nagsakay sa ila motorsiklo kag sang nagpundo ang pick-up truck, may naggwa nga lalaki nga may ginauyatan nga binangon.
Bangud sa kahangawa, wala na ginsundan sang mga ini ang pick-up truck nga sa ulihi natukiban nga ginapanag-iyahan sang residente sang Cabatuan, Iloilo.
Suno kay Dieron, personal nga nagkadto ang driver sang pick-up sa Calinog Municipal Police Station kag ginklaro nga ang sakay sini, amo ang mag-asawa kun sa diin hubog ang bana kag naling-an sa iya sini nga asawa rason nga nagtaas ang tingog sini.
Ginpahayag sini nga napatup-an sang bana ang iya asawa sang amo nga tion rason nga nakasinggit ini ang tabang.
Apang suno sa driver, indi matuod nga gin-abduct nila ang babaye baliskad sa nauna nga pagpati sang mga witness sa insidente.
