Ginalauman nga pirmahan na subong nga adlaw, Hulyo 8, ang Reciprocal Access Agreement (RAA) nga amo ang magapahanugot sa tropa-militar sang Pilipinas kag Japan nga mag-operate kag mag-hanas sa teritoryo sang kada isa.
Sandig sa Presidential Communications Office (PCO), kadungan ini sang pagbisita nanday Japanese Foreign Minister Kamikawa Yoko kag Defense Minister Kihara Minoru kay President Ferdinand R. Marcos Jr. sa Malacañang. Kasunod sang courtesy call, ang presidente mismo ang magasaksi sa pirmahanay sang amo nga landmark deal.
Kaangay sa Visiting Forces Agreement (VFA) nga kasugtanan sang Pilipinas kag Estados Unidos sang Amerika, ang RAA ang ginalauman nga magahimo man sang protocols para sa pag-estasyon kag pagpadala sang military assets sang Japan sa Pilipinas —amo man ang iya sang Pilipinas didto sa Japan.
Una na nga ginlaragway ni President Marcos nga “tuman ka importante” ang amo nga agreement nga pirmahan na subong nga tuig.
Magluwas sa courtesy call, magapakigkita man ang Japanese officials kanday Foreign Affairs Secretary Enrique Manalo kag Defense Secretary Gilbert Teodoro Jr. para sa ikaduha nga Philippines-Japan Foreign and Defense Ministerial Meeting (“2+2”).
Suno sa ahensya, lakip sa istoryahan sang apat ka ministro amo ang bilateral kag defense kag security issues nga nagaapekto sa rehiyon kag magabayluhanay man sang opinyon sa nanuhay-tuhay nga regional kag international issues. Sa amo nga official visit, magapatigayon man sanday Manalo kag Teodoro sang separado nila nga bilateral meetings sa ila counterparts agud nga maistoryahan ang dugang nga mga concerns.
Maga-upod man ang senior Japanese lawmakers lakip si Japanese House of Representatives member Wada Yoshiaki agud nga maistoryahan kun ano pa ang mahimo sang Japan kag Pilipinas sa problema sa West Philippine Sea.
Suno pa sa DFA, ang 2+2 Foreign and Defense Ministers Meeting amo ang pinakamataas nga consultative mechanism sa tunga sang Pilipinas kag Japan. Isa ini ka plataporma nga magapabaskog sang dinekada na nga Strategic Partnership sa tunga sang duha ka nasyon.
Matandaan nga sang nagbisita si Japanese Prime Minister Fumio Kishida sa Pilipinas, nagsiling ini nga gina-ugyunan sini si President Marcos nga umpisahan na ang negosasyon sa reciprocal access agreement para mapasugtan ang militar sang Japan kag Pilipinas nga magpatigayon sang joint military exercises kag mapapag-on pa ang defense cooperation.
Una naman nga nagsapubliko ang Marcos administration sang interes nga updon ang Japanese forces sa Balikatan military exercises sa masunod nga tuig.
Matandaan nga gin-invade sang mga Hapones ang Pilipinas sang 1942-1945 apang suno kay Japanese Ambassador to the Philippines Kazuya Endo, may commitment ang Japan nga indi na pagsuliton ang trahedya sang nakaligad. Suno kay Endo, napamatud-an na sang Japan Self-Defense Forces (JSDF), pwersa nga nagbulos sa Imperial Japanese Armed Forces pagkatapos sang World War II, nga isa ini ka “key stabilizer” sa rehiyon.
Pagkatapos nga mapirmahan ang RAA, kinahanglan nga i-ratify sang legislative bodies sang duha ka pungsod ang amo nga treaty antes ini mapatuman na.
