ILOILO CITY- Ginsaysay sang person of interest nga nanugid kun sa diin nalubong ang bangkay sang pageant contestant nga si Geneva Lopez kag nobyo nga Israeli nga si Yitshak Cohen kun paano gindala sa quarry site sa Capas, Tarlac ang mga biktima.
Suno kay Philippine National Police spokesperson Police Col. Jean Fajardo, ginsugid ni Junjun, isa ka mekaniko, nga gintawgan siya sang principal suspects sa krimen nga may kay-uhon nga dako nga equipment apang nakibot siya sang ginsugo nga siya ang magmaneho sang salakyan nga SUV sang biktima kun sa diin yara nagasakay ang duha nga wala na sang kabuhi kag naputos sang habol ang mga nawong.
Pahayag sang mekaniko, ang una nga plano amo ang mangita sang equipment para makakutkot apang wala nadayon.
Siya ang ginsugo man nga sunugon ang SUV sang mga biktima.
Gindugang niya nga gintanyagan siya sang suspects sang P50,000 agud maghipos apang wala nagtuman ang mga suspetsado.
Matandaan nga nagsungka si Junjun sa otoridad kag gintudlo kun diin nalubong ang mga biktima.
Ginapangita naman subong ang duha pa ka mga indibidwal nga ginaalegar may papel man sa ginhimo nga krimen.
Ginpahayag naman sang pulis nga mahimo man nga mangin state witness si Junjun batok sa principal suspects.
Una na ginbuyagyag ang mastermind nga amo si Michael Guiang, pulis nga nag-absent without leave [permission] ukon nag-AWOL sang 2020, kag ang buddy sini kag kahimbon man sa krimen nga si Rommel Abuso nga nag-awol naman sang 2019.
Pareho nga patrolman anay ang duha ka mga suspek.
