ILOILO CITY – Wala pa sang pinal nga petsa kun san-o magapungko ang bag-o nga director sang Iloilo City Police Office.
Sa interview sang Bombo Radyo kay Iloilo City Mayor Jerry Treñas, iya ginpahayag nga nag-courtesy call na kahapon sa iya si incoming director Police Col. Kim Legada nga amo ang magabulos kay outgoing director Police Col. Joeresty Coronica.
Si Legada ang nangin chief of police sang una nga nagpungko si Treñas bilang alkalde sang syudad kag sa subong nagapungko bilang Chief sang Regional Plans and Strategy Management Division sang Police Regional Office 6.
Kaupod nanday Legada kag Coronica nga nagpadulong sa opisina sang alkalde si Police Regional Office 6 Director Police Brigadier General Jack Wanky.
Suno kay Treñas, nagalaom siya nga matupungan ukon malapawan ni Legada ang nangin performance ni Coronica.
Pahayag sang alkalde, dalawayon ang mga hinumuan ni Coronica bilang isa ka director.
Gin-athag man sang natungdan nga ang pag-ilis sang director sang kabahin sang mando sang Philippine National Police nga ilisan ang pinuno sang mga Police Office sa pungsod nga nagapungko sang masobra isa ka tuig antes ang election period.
