Ginmando sang Court of Appeals (CA) ang pag-freeze sang mga bank accounts kag personal assets sang suspendido nga si Bamban, Tarlac Mayor Alice Guo kag duha ka iban pa.
Suno sa Anti-Money Laundering Council (AMLC), ang Court of Appeals ang nagpaguwa sang resolusyon, isa ka adlaw pagkatapos nga gin-file sang ahensya ang petisyon para sa freeze order.
Ginpahayag man sang AMLC nga sanday Guo, Zhiyang Huang, kag Baoying Lin ang ginasuspetsahan nga naga-operate sang human trafficking kag malimbungon nga mga hilikuton paagi sa mga entities pareho sang Zun Yuan Technology Inc., BAOFU Land Development Inc. kag Hongsheng Gaming Technology Inc.
Nagsiling man ang AMLC nga ang mando sa pag-freeze ang nagasakop sang 90 ka mga bank account sa 14 ka mga institusyon pinansyal, pila ka mga propedad sa real estate, kag mataas nga balor nga personal nga mga propedad pareho sang mga luho nga mga salakyan, kag isa ka helikopter.
Gin-athag man sang ahensya nga ang mando sa pag-freeze ang may tuyo nga magpugong sang pagkadula sang mga pagkabutang samtang ang imbestigasyon kag legal nga mga paghusay ang nagapadayon.
