ILOILO CITY- Ginpanginwala sang Armed Forces of the Philippines (AFP) kag Philippine Navy ang naggwa nga impormasyon nga nag-walk-out ang mga generals sa isa ka command conference kaupod kay President Ferdinand Marcos, Jr, sang Hulyo 4.
Suno kay Col. Francel Margareth Padilla, spokesperson sang Armed Forces of the Philippines, fake ang amo nga impormasyon bangod personal ini nga nagtambong sa event kag wala sang kaangay nga natabo.
Wala naman nagdugang sang detalye si Padilla tuhoy sa command conference.
Ginpanginwala man ni Rear Adm. Roy Vincent Trinidad, Navy spokesman for the West Philippine Sea, ang amo nga claims kag ginsiling nga nagapabilin nga intact ang chain of command.
Gindugang niya nga nagapabilin nga mapag-on ang maayo nga working relationship sa higher headquarters, partikular na ang Department of National Defense.
Matandaan nga ginpangunahan ni President Ferdinand Marcos Jr. ang mid-year command conference sa AFP General Headquarters sa Camp Aguinaldo, Quezon City sang Hulyo 4 kaupod kanday Defense Secretary Gilberto Teodoro Jr., Executive Secretary Lucas Bersamin, Special Assistant to the President Antonio Lagdameo, Gen. Romeo Brawner Jr. nga amo ang AFP chief, kag mga service unit commanders, ground commanders, kag iban nga high-ranking officials.
Sa amo nga conference, ginmanduan ni Marcos ang militar nga buhinan ang tensyon sa West Philippine Sea,base sa pahayag ni Brawner.
