Nagaguwa sa survey sang Pulse Asia nga mas mataas gihapon ang approval and trust ratings ni Vice President Sara Duterte ipaanggid kay President Ferdinand ‘Bongbong’ Marcos, Jr.
Ini nga survey ang gin-conduct sang Hunyo 17-24 kun sa diin sulod ang petsa sang pag-resign ni Sara sa Gabinete ni Marcos partikular ang pagpanaog sini sa posisyon bilang tiglikom sang Department of Education (DepEd).
Sandig sa resulta, nakakuha ang bise-presidente sang approval rating nga 69 percent nga 16 points nga mas mataas sa 53 percent approval score ni Marcos.
Kun ipaanggid sa amo man nga survey nga ginpatigayon sang Marso subong nga tuig, nakitaan sang dos puntos nga pagsaka sa approval rating ni Duterte halin sa 67% samtang nagnubo man sang dos puntos ang para kay Marcos halin sa 55%.
Sa gin-survey nga mga lugar, pinakamataas ang rating sa performance ni Marcos sa Metro Manila nga may 61 percent (halin sa 47 percent), ginasundan sang nabilin nga bahin sang Luzon nga may 57 percent (halin sa 66 percent), Visayas nga may 56 percent (halin sa 54 percent) kag Mindanao nga may 38 percent (halin sa 40 percent).
Para naman kay Sara, halos ukon kumpleto gid nga 95% sa ila baluwarte sa Mindanao ang nagsiling nga aprubado nila ang iya performance (halin sa 92 percent), ginasundan sang Visayas nga may 80 percent, Metro Manila nga may 64 percent kag nabilin nga bahin sang Luzon nga may 54 percent.
Kun trust ukon pagsalig naman ang hambalan, daku ang antad sang duha bangud sa 71% nga nakuha ni Sara samtang 52% lamang ang kay Marcos.
Nahibaluan nga 2,400 ang respondents sa sini nga survey nga nagaedad 18-anyos pasaka paagi sa face-to-face interviews nga may ±2% error margin sa 95% confidence level.
