Ginalauman nga mas ma-address ang kakulangan sa procurement system sang gobyerno kag mas maproteksyunan ang consumers batok sa financial scams paagi sa duha ka layi nga ginpirmahan ni President Ferdinand Marcos, Jr. antes ang iya ikatatlo nga State of the Nation Address (SONA) buwas, Hulyo 22.
Ang New Government Procurement Act (NGPA) ukon Republic Act (RA) 12009 ang nagatuyo nga masabat ang loopholes sa government procurement system, malikawan ang pag-uyang, siguruhon ang maayo nga serbisyo paagi sa pagtapna sang iregularidad, kag pagpapas man sang mga oportunidad para sa kurapsyon.
Sa idalom sini nga layi, panubuon ang period sang procurement halin sa 90 ka adlaw panaog sa 60 ka adlaw halin sa pagbukas sang bids tubtub sa awarding sang kontrara.
Gina-standardize man sini ang procurement forms kag gina-institutionalize ang electronic procurement.
Sa pihak nga bahin, ang Anti-Financial Account Scamming Act (AFASA) ukon RA 12010 ang nagatuyo nga dagdagan sang penalidad ang perpetrators sang financial cybercrimes kag mas dakuon man ang multa sa nagahimo sang illegal acts sa idalom sang Revised Penal Code.
Lakip diri ang online selling kag investment scams, phishing kag iban nga fraudulent schemes.
Silutan diri ang involved sa money muling activities, social engineering schemes, economic sabotage kag iban pa nga mga krimen nga involved ang financial accounts.
Ginpahayag ni Marcos nga ini nga layi ang magaprotekta sa mga Pilipino sa tion nga nagagamit naman ang mga cybercriminal sang teknolohiya agud nga makapatigayon sang krimen nga nagatuga sang financial losses kag rason man kun nga nagakadulaan sang salig ang mga Pinoy sa financial institutions.
