ILOILO CITY – Nagapati si Bayan Muna chairman Atty. Neri Colmenares nga may dako nga tawo ukon politiko nga amo ang utok sa pagpalapta sang fake viral video sa diin makit-an si President Ferdinand “Bongbong” Marcos Jr. nga nagagamit sang iligal nga droga.
Ang nasambit nga video ang una nga ginpagwa sa pagtitilipon sang Duterte-linked nga MAISUG sa Los Angeles sa Estados Unidos.
Sa interview sang Bombo Radyo kay Colmenares, iya ginpahayag nga ang peke nga video ang pamatuod nga may intensyon sang destabilisasyon batok sa administrasyon ni Marcos.
Ginlaragway naman sang natungdan nga ‘defensive’ ang ginhimo nga pagpagwa sang pahayag nanday Department of National Defense Sec. Gilbert Teodoro kag Department of Interior and Local Government Sec. Benhur Abalos sa nasambit nga video.
Samtang, wala man ginpaboran ni Colmenares ang pagpangayo sang Marcos administration sang bulig sa Amerika agud makilala ang sa likod sang malisyoso nga video.
Ginpahayag sini nga wala nagakaigo nga magpangayo sang bulig ang gobyerno sa iban nga pungsod sa away politika sa Pilipinas.
