Gin-anunsyo sang Partido Demokratiko Pilipino (PDP) nga si Senator Robinhood Padilla na ang bag-o sini nga party president 10 ka bulan antes ang May 2025 midterm elections.
Sa statement sang partido, ginpahayag sini ang kumpyansa sa liderato ni Padilla nga mapadayon ang pag-consolidate sang party membership kag magpreparar para sa palaabuton nga eleksyon.
Nagapati man ang partido nga yara sila sa maayo nga kamot sa idalom sang pagpamuno sang senador kag magapabilin nga isa ka daku nga pwersa para sa pagbag-o kag pag-uswag sang nasyon.
Antes nanumpa si Padilla bulos kay Pampanga 2nd District Rep. Jose Alvarez nga nag-resign sa pwesto, gin-uyatan sini ang posisyon nga executive vice president kag acting president.
Nahibaluan nga 20 ka bulan man nga nagpamununo sa grupo si Alvarez.
Sang nagligad lamang nga Abril, matandaan nga nagtipon ang mga lider sang partido lakip na si former president kag chairman sini nga si Rodrigo Duterte kun sa diin nadesisyunan nga kakason na ang Laban sa PDP Laban.
Una naman nga ginpahayag sang partido nga magahimo ini sang senatorial lineup para sa 2025 polls kun sa diin ma-representar gid ang tanan nga rehiyon sa Pilipinas. Lakip sa sini nga senatorial slate amo sanday incumbent Senators Bong Go, Ronald dela Rosa, Francis Tolentino kag ang actor nga si Philip Salvador.
