ILOILO CITY – Bata pa lang mahiligon na sa arts and crafts ang Ilonggo nga Top 5 sa July 2024 Licensure Examination for Interior Designers.
Ini amo si Jerwin Seth Velete sang Barangay D.G. Abordo, Janiuay, Iloilo kag graduate sang University of San Agustin sang 2022.
Si Velete ang nakakuha sang 84.95% nga rating sa nasambit nga pasinawan.
Sa interview sang Bombo Radyo kay Velete, iya ginpahayag nga nakaandan na sini nga maghimo sang nagkalain-lain nga arrangement sa sulod sang ila balay nga amo man ang nagtulod sa iya sa pagkuha sang kurso nga Bachelor of Science in Interior Design.
Magluwas diri, may yara man ini sang himata nga iskultor kag pintor nga nagapamatuod nga yara na sa ila dugo nga mangin artist.
Suno kay Velete, nangin challenging man ang iya pagtuon sa kolehiyo bangud natuon ini sa tion sang pandemya.
Apang sa pihak sini, wala ini nangin upang agud mangin kabahin ini sang dean’s list humalin sang 2nd year tubtob 4th year.
Nahibaluan nga antes pa man nakapasar sa pasinawan, nahatagan na si Velete sang kahigayunan nga makatrabaho sa isa ka Interior Design Studio.
