Balantayan ang apat ka miyembro sang Team Philippines nga magasabak na sa kumpetisyon sa Paris Olympics subong nga adlaw, Hulyo 30 (Ph time).
DELGACO
3:30 karon sa hapon, maga-compete si Joanie Delgaco sa rowing (women’s single sculls – quarterfinals).
Mangin mabudlay ang banas para sa 26-anyos nga labing-una nga Filipina rower sa Summer Games bangud nagtupa ini sa third heat kun sa diin makasumpong sini ang reigning gold medalist nga si Emma Twigg sang New Zealand nga nagatuyo nga madepensahan ang iya titulo.
Magluwas diri, atubangon man sini ang anay under-23 world champion nga si Katharina Janzen sang Switzerland kag iban pa nga rowers halin sa Europa.
WATANABE
4:00 karon sa hapon, balantayan naman ang Filipina-Japanese judoka nga si Kiyomi Watanabe sa judo, women’s -63kg, round of 32.
Si Watanabe ang naka-compete man anay sa Tokyo Olympics. Subong sa Paris, atubangon sini si Tang Jing sang China.
SANCHEZ
6:39 karon sa gab-i, maga-compete naman si Kayla Sanchez sa swimming, women’s 100m freestyle, Heat 4, kun sa diin nagakinahanglan nga mangin kabahin ini sang 16 sa pinakamadasig agud nga makalab-ot sa semifinals.
Si Sanchez ang nag-represent anay sa Canada sa Tokyo Olympics kun sa diin nabuligan sini ang delegasyon nga makakuha sang duha ka medals sa relay.
PETECIO
Samtang, antes magtakop ang Martes ukon 11:54 karon sa gab-i, maga-compete man ang isa sa potensyal nga gold medalist sang Pilipinas nga si Nesthy Petecio sa boxing sa women’s 57kg, round of 32.
Makaatubang sini si Jaismine Lamboria sang India sa iya misyon nga makabawi matapos nagdaog sang silver medal sa Tokyo Olympics 2020.
Bantayi ang updates sa Bombo Radyo Philippines paagi sa 31 sini ka fully-digitalized FM and AM stations nationwide kag kaupod man ang pwersa sang 50 ka international correspondents direkta gikan sa City of Love. #
