Nagpaathag si Iloilo City Councilor Atty. Rommel Duron nga “expression” lamang niya ang pagsinggit sang “istorya inagi” kadungan sang session sang Sangguniang Panlungsod sang nagligad nga Myerkules.
Madumduman nga sa amo nga session nangin mataas ang tension sa tunga nanday Duron kag Councilor Sedfrey Cabaluna kun sa diin ginkwestyon pa ni Duron si Cabaluna kun ginahimo man bala sini ang iya responsibilidad.
Sa interview sang Bombo Radyo kay Duron, iya ginpahayag nga nangin mataas man ang iya emosyon sang amo nga tion rason nga nakabuya man ini sang amo nga mga tinaga.
Pahayag pa sini, indi lang siya kumporme sa istilo ni Cabaluna nga kumplikado, malawig, kag gulpyada lang nga ginaduso — indi pareho sa iya nga naga-research gid antes i-file ang resolution kag gina-defer pa gani kun indi siya handa.
“If you want to question sa facts ko ya, pwede mo gid makwestyon,” pahayag ni Duron sang ginpaanggid ang iya istilo kay Cabaluna.
Magluwas diri suno kay Duron, nalawigan pa ini sa komentaryo ni Cabaluna rason man sang iya pagpanginit.
Ang pagbaisay sang duha ka mga konsehal ang nag-ugat sa resolusyon ni Councilor Duron sang nagligad nga binulan nga nagapanawagan sa pag-reevaluate sang Public Utility Vehicle Modernization Program (PUVMP).
Gin-refer ini sa committee ni Councilor Cabaluna sa Transportation apang wala nakatambong si Duron sa ginpatawag nga committee hearing.
Sang Myerkules, liwat nga nagpasar sang resolusyon si Duron nga nagapanawagan sa Office of the President kag Congress sa reevaluation sang programa, apang nagpaathag si Cabaluna nga ginpa-set niya liwat ang schedule sang hearing bangud hulaton ang iya presensya bilang proponent sang resolusyon.
Ginklaro man sini nga wala sila sang personal nga away ni Cabaluna kag “isyu” gid lamang sa konseho ang ila gina-istoryahan.
“Nothing personal to ya. Isyu man lang to ang amon. Gatapungulay gani sa Kongreso, dira pa,” pahayag pa sang konsehal.#
