Nagsugtanay ang Pilipinas kag ang Germany nga mas padalumon kag pasangkaron pa ang military cooperation sa tunga sang duha ka pungsod.
Ini kasunod sang pagkit-anay nanday German Defense Minister Boris Pistorius kag Defense Secretary Gilberto Teodoro sa Manila kun sa diin ginpromisa nga pirmahan ang defense cooperation agreement antes magtakop ang tuig.
Ini nga kasugtanan ang magatutok sa “mutual understanding” kaangot sa training kag pagbayluhanay sang mga impormasyon.
“We collaborate because we have a shared vision of respect for the United Nations Charter… and our desire to see a stable and peaceful Indo-Pacific,” suno kay Teodoro.
Nagpasalig man ang duha ka opisyal nga magtukod sang “long-lasting relations” sa tunga sang armed forces kag ginpaguwa man ang posibilidad nga mag-suplay ang Germany sang military equipment sa Pilipinas.
Nahibaluan nga ginapasangkad pa sang Pilipinas ang relasyon sini sa depensa sa Asia-Pacific region kag mangin sa iban pa nga pungsod sa tunga sang padayon nga pag-claim sang China nga ila ang West Philippine Sea.
Isa ang Germany sa ginakabig nga oldest formal defense partners sang Pilipinas nga na-establisar paagi sa 1974 administrative agreement nga nagalakip sa training sang Filipino troops.
