Nag-resign na si Senate Majority Leader Francis Tolentino sa Partido Demokratiko Pilipino (PDP) kun sa diin ang ginplastar sini nga rason amo ang kinalain sang ila panindugan sa isyu sa West Philippine Sea (WPS).
Nakasaad ini sa sulat ni Toletino kay PDP President kag Senator Robin Padilla matapos man nag-request si Padilla nga magbiya na lang si Tolentino sa partido agud nga malikawan ang anuman nga conflict of interest kaangot sa political issues.
Sa iya sulat kay Padilla nga napetsahan sang Agusto 5, ginsiling ni Tolentino nga ginabugras na sini ang kaugalingon sa mga aktibidad sang partido kag magapadayon ini bilang isa ka independent legislator epektibo gilayon.
Ginpahayag nga mahinalungon niya nga ginkonsiderar ini nga desisyon apang nakit-an gid ang deperensya sa ila mga direksyon sa foreign policy ilabi na sa West Philippine Sea.
Gin-highlight ni Tolentino sa iya sulat nga kinahanglan i-uphold ang 2016 Arbitral Ruling bangud importante ini para sa territorial integrity sang pungsod.
Ginsiling man sini nga wala bug-os nga naga-align ang direksyon sang partido sa mga prinsipyo nga naestablisar sa idalom sang Arbitral Ruling kag posible pa nga makapahina sang posisyon sang Pilipinas sa international arena.
Nahibaluan nga ang chairman sang PDP amo si anay Presidente Rodrigo Duterte nga una man anay nakapahayag nga isa lamang ka papel nga inughaboy ang arbitral victory sang Pilipinas sang 2016 batok sa China nga amo ang naga-claim sa West Philippine Sea.
Bangud wala na si Tolentino sa PDP, tatlo na lang sa 24 ka mga senador ang yara sa amo nga partido — Robin Padilla, Bong Go, kag Bato dela Rosa.#
