ILOILO CITY- Magasugod na subong nga Mierkules, Agusto 14, ang transport group nga Manibela sang ila tatlo ka adlaw nga transport strike.
Suno kay Mar Valbuena, presidente sang Manibela, ang ila mga miyembro sa probinsya ang magaprotesta man batok sa panindugan ni President Ferdinand Marcos Jr. nga iimplementar gid ang Public Transport Modernization Program (PTMP).
Lakip sa nalawagan ni Balbuena nga maga-upod sa transport strike amo ang Baguio, Pangasinan, Central Luzon, Ilagan kag Cauayan sa Isabela, CALABARZON, Western Visayas,Cebu, Lapu Lapu, Ormoc, Tacloban, Catbalogan, Iligan Butuan, Cagayan de Oro City, Sarangani kag Davao City.
Nagapakig-angot man ang Manibela sa mga lider sang transport group nga Piston nga nag-anunsyo man sang ila pag-ugyon sa strike.
Ang transport strike magalawig tubtob sa Agusto 16.
Nahibaluan nga may ginduso nga Senate Resolution 1096 nga pirmado sang 22 sa 23 senators kun sa diin ginpropose ang temporaryo nga suspensyon sang implementasyon sang transport modernization program apang wala ginpatihan ni Marcos ang amo nga resolusyon kag nag-insister nga dayunon ang modernisasyon.
Base sa record sang Department of Transportation (DOTr), yara na sa 81.11% or 155,513 of 191,730 PUV units ang naka-consolidate na as of Mayo kag 36,217 naman ang nagapabilin nga unconsolidated.
